Útgangspunktur verkefnisins er sýning á verkum Nínu Tryggvadóttur (1913-1968) og Gunnlaugs Schevings (1904-1972) sem ber heitið Alls konar landslag. Nemendum í 5.-7. bekk víðsvegar af Austurlandi verður boðið í leiðsögn um sýningu Skaftfells og listasmiðju sem er hugsuð sem kveikja að stærra verkefni sem nemendur munu vinna í kjölfarið t.d. í myndmenntatímum. Leiðbeinandi er Oddný Björk Daníelsdóttir, listfræðingur.
Verkefnið skiptist í þrjá hluta:
I. Hluti: Leiðsögn og listsmiðja í Skaftfelli
Nemendur munu kynnast verkum Nínu og Gunnlaugs, skoða þau í samhengi við listasöguna og jafnframt kryfja innihald, tjáningarform og listræna þróun þessara tveggja listamanna. Nína og Gunnlaugur voru samtímamenn en þróuðust í ólíkar áttir í list sinni; verk Gunnlaugs voru alla tíð hlutbundin og viðfangsefni hans var landslag og íslensk alþýða. Þróunin í verkum Nínu var hins vegar sú að þau urðu sífellt óhlutbundnari og ljóðrænni með tímanum.
Þessar andstæður verða sérstaklega skoðaðar auk þess sem fjallað verður um hugtök sem tengjast málverkinu eins og t.d. myndflötur, myndbygging, litasamsetning, hlutbundið, óhlutbundið o.s.frv.
Í listsmiðjunni verða gerðar léttar æfingar sem er hugsaðar sem kveikjur að stærra verkefni sem nemendum er boðið að taka með sér og vinna áfram í myndmenntatímum í sínum skóla.
II. Hluti: Heimaverkefni í myndmenntatímum
Verkefnið er í senn einstaklings- og hópaverkefni. Eftir að hafa kynnst verkum Nínu og Gunnlaugs fær hver nemandi fyrir sig eftirprentun af einu verki frá hvorum listamanni til að vinna með. Myndinni er skipt upp í búta og mun hver og einn nemandi fá úthlutaðan einn bút úr myndinni til að stækka upp. Í lokin eru allir bútarnir festir saman þ.a. útkoman verður stór eftirmynd af frummyndin sem unnið var með.
Ath. að hver skóli fær afhentar myndir í stafrænu formi sem búið er að búta niður eftir því sem hentar hverjum hópi fyrir sig. Það eina sem kennarinn þarf að gera er að prenta bútana út á A4. Nemendur þurfa svo að yfirfæra sinn bút á A3 eða A2.
III. Hluti: Sameiginleg lokasýning
Fræðsluverkefnið er að þessu sinni hluti af BRAS – menningarhátíð barna og ungmenna á Austurlandi. Undirtitill hátíðarinnar er Þora – Vera – Gera. Skaftfell leggur til fræðsluverkefnið og býður nemendum og kennurum um leið að taka það lengra. Okkar hugmynd er sú að nemendurnir finni sjálfir út úr því hvernig hægt er að gera útkomuna sýnilega og biðjum þau, undir handleiðslu umsjónar- eða myndmenntakennara, um að koma með tillögur að opinberu rými í sínum bæ þar sem hægt verði að hengja upp samsettu myndina og hafa hana til sýnis á meðan á hátíðinni stendur.
Fyrri fræðsluverkefni Skaftfells: https://old.skaftfell.is/fraedsluverkefni-fyrir-grunnskola/
